Ode en dialogue, l'Espérance et Ronsard

Pipé des ruses d'Amour Je me promenois un jour Devant l'huis de ma cruelle, Et tant rebuté j'estois, Qu'en jurant je prometois De m'enfuir de chez elle. Il sufist d'avoir esté Neuf ou dix ans arresté Es cordes d'Amour, disoie, Il faut m'en developer, Ou bien du tout les couper Afin que libre je soie. Et pour ce faire, je pris Une dague, que je mis Bien avant dedans la lesse : Et son noud j'eusse brisé Si lors je n'eusse avisé Devant l'huis une Déesse. Mais incontinent que j'eu Son dos garny d'aisles veu, Sa robbe et sa contenance, Et son roquet retroussé Incontinent je pensé Que c'estoit dame Espérance. Je m'aproche, elle me prit Par la main, puis ell' me dit : ESPERANCE Où vas-tu pauvre poëte ? Tu auras avec le tems Tout le bien que tu pretens, i Et plus que tu n'en souhete. Ta maistresse avoit raison De tenir quelque saison Rigueur à ta longue peine Elle le faisoit expres, Pour mieux resonder apres Ton caeur, et ta foy certaine. Mais ores qu'elle sait bien Par seure espreuve combien Ta peneuse amitié dure ; D'elle mesme te prira, Et benigne, garira Le mal que ton coeur endure. Alors je luy répondis : RONSARD É qu'esse que tu me dis ? Veux-tu r'abuzer ma vie Apres me voir échapé De celle qui m'a trompé, Veux tu que je m'y refie ? Dix ans sont que je la suis Et que pour elle je suis Come une personne morte Mais en lieu de lui ployer Son orgueil, pour tout loyer Je muse encor à sa porte. Non non, il vaut mieus mourir Tout d'un coup, que de perir En langueur par tant d'années : Ores je veux de ma main Me tuer, pour voir soudain Toutes mes douleurs finées. L'ESPERANCE Ah, qu'il te feroit bon voir De tomber en desespoir, Quand l'Esperance te guide ! Laisse laisse ton emoy, Laisse ta dague et sui moy Là haut chés ton homicide. Disant ces motz je suivy Ses pas, tant que je me vy Dans la chambre de Cassandre : L'ESPERANCE PARLE A CASSANDRE Tien, dist l'Esperance, tien Tout expres icy je vien Pour ton fugitif te rendre. Il t'a servi longuement, C'est raison que doucement Ses angoisses tu lui ostes : Il te faut bien le traiter, Craignant ce grand Jupiter, Puis qu'il est l'un de tes Hostes. Atant elle s'en vola, Et tout seul me laissa là Dedans ta chambre, m'amie. RONSARD PARLE A CASSANDRE Là, donques par amitié, Là, Cassandre, pren pitié De ton Hoste qui te prie. Si j'ay quelque mal chés toy, Jupiter le juste Roy Te dardera sa tempeste : Car il garde ceux qui sont Hostes, et ceux là qui font En misere une requeste.