Ne hurtez plus a l'uis de ma pensee

Ne hurtez plus a l'uis de ma pensee, Soing et Soussi, sans tant vous traveiller ! Car elle dort et ne veult s'esveiller ; Toute la nuyt en paine a despensee. En dangier est, s'elle n'est bien pensee. Cessez ! cessez ! Laissez la sommeiller ! Ne hurtez plus a l'uis de ma pensee, Soing et Soussi, sans tant vous traveiller ! Pour la guerir bon Espoir a pensee Medecine qu'a fait apareiller ; Lever ne peut son chief de l'oreiller, Tant qu'en repos se soit recompensee. Ne hurtez plus a l'uis de ma pensee !