Qui seroit dans les Cieux, et baisseroit veuë

Qui seroit dans les Cieux, et baisseroit veuë Sur le large pourpris de ce sec element, Il ne croiroit de tout, rien qu'un poinct seulement Un poinct encor caché du voile d'une nuë: Mais s'il contemple apres ceste courtine blüe, Ce cercle de cristal, ce doré firmament, Il juge que son tour est grand infiniment, Et que ceste grandeur nous est toute incognuë. Ainsi de ce grand ciel, où l'amour m'a guidé De ce grand ciel d'Amour où mon oeil est bandé Si je relasche un peu la pointe aigue au reste, Au reste des amours, je vois sous une nuict Du monde d'Epicure en atomes reduit, Leur amour tout de terre, et le mien tout celeste.