A Pierre de Ronsard

Entrant le peuple en tes sacrez bocaiges, Dont les sommez montent jusques aux nues Par l'espesseur des plantes incognues, Trouvoit la nuict en lieu de frez umbraiges. Or te suivant le long des beaux rivaiges Où les neuf seurs à ton chant sont venues, Herbes, et fruitz, et fleurettes menues Il entrelace en cent divers ouvraiges. Ainsy, Ronsard, ta trompe clair sonnante Les forestz mesme et les mons espouvente Et ta guiterne esjouit les vergiers. Quand il te plaist tu esclaires et tonnes, Quand il te plaist doulcement tu resonnes, Superbe au Ciel, humble entre les bergiers.